Хөрмәтле укучылар, укытучылар әти-әниләр һәм барлык мәгариф өлкәсендә эшләүче хезмәткәрләр!
Барыгызны да яңа 2008-2009 уку елы башлану белән кайнар котлыйбыз! Нык сәламәтлек, укуыгызда уңышлар, тормышыгызда шатлыклар һәм бәхетләр теләп калабыз! Яңа уку елы бары тик яхшылыклар гына алып килсен!

   

   Уку елы якынлаша. Мәктәпләр яңа уку елына әзер. Укытучылар яңа уку елына методик һәм педагогик осталыкларын үстереп, киңәшмәләргә җыйналдылар. Районда киңәшмәләр бер атнага сузылды. Пленар утырыш Чепья мәдәният йортында үткәрелде. Мәгариф бүлеге мөдире Вакыйф Зәкиевнең отчет докладында үткән уку елы эшчәнлегенә анализ ясалды. Мәктәпләрнең уңышлары күрсәтеп үтелде. Безнең мәктәп коллективының да эшчәнлеге күркәм итеп искә алынды.
   

   Мәктәбебезнең озак еллар һәм нәтиҗәле педагогик эшчәнлек алып барган рус теле һәм әдәбияты укытучысы Таһүрә Бәйрәмова ТР Мәгариф Министрлыгының “Мәгарифтәге казанышлары өчен” билгесенә лаек булды. Таһүрә Зыятдиновна күп еллар дәвамында укучыларны рус теле һәм әдәбияты буенча сәләтле укучыларны район һәм республика олимпиадаларына хәзерләү буенча нәтиҗәле эш алып бара. Аның укучылары республика олимпиадаларында призлы урыннар яулыйлар. Алга таба да иҗади уңышлар юлдаш булсын сезгә, Таһүрә Зыятдиновна!
   

   Озак еллар дәвамында башлангыч класслар укытучысы булып эшләүче Лира Робертовна эшчәнлеге дә мактауга лаек. Нәтиҗәле педагогик эшчәнлеге өчен ул да район мәгариф бүлеге Грамотасына һәм кыйммәтле бүләккә лаек булды. Тәбрик итәбез сезне, Лира Робертовна! Алга таба да эшчәнлегегездә зур уңышлар гаиләгездә бәхет-шатлык, нык сәламәтлек теләп калабыз!
   

   Август киңәшмәсендә районыбыз мәктәпләренең сәләтле балалары 8-10 класс укучылары өчен физика-астрономия, информатика, инженерия фәннәре буенча үткәрелә торган “Абага чәчәге” олмпиадасы эшчәнлеге мактауга лаек булды. Шулай ук район мәктәпләре укучылары арасында Интернет аша үткәрелә торган юлда йөрү кагыйдәләрен һәм гадәттән тыш хәлләр килеп чыкканда үз-үзеңне тоту кагыйдәләрен өйрәнү буенча “Көнбагыш” конкурсы эшчәнлеге дә макталды. “Абага чәчәге” олмпиадасын һәм “Көнбагыш” конкурсын оештыручы, алып баручы укытучыбыз Рәфхәт Зарипов мәгариф бәлегенең Мактау Грамотасына һәм кыйммәтле бүләккә лаек булды.
   

   Мәктәбебездә 18 ел дәвамында директор булып эшлгән Хаҗиев Фәрт Газыймович Норма урта мәктәбенә директор итеп күчерелде. Фәрт Газыймович директор буларак хәзерге мәктәп бинасын 1980-1982 елларда төзеткән иде. 1992 елда кабат директор булып кайтканнан соң мәктәптә бик күп төрле ремонт эшләре башкарды. Бу чорда мәктәп коллективы дп педагогик һәм методик яктан да шактый үсте. Мәктәпкә директор итеп моңарчы район хакимиятендә халыкны социаль яклау бүлеге башлыгы булып эшләгән Рәйсә Галимҗан кызы Мхәммәдиева билгеләнде. Рәйсә Мөхәммәдиева мәктәп өчен таныш кеше. Ул профессиясе буенча укытучы буларак педагогик эшчәнлеген Түнтәр мәктәбендә башлап җибәргән иде. Хәзер инде ул мәктәпкә җитәкчелек эшендә зур тәҗрибә туплап кайтты. Аңа авыр хезмәтендә уңышлар теләп калабыз
   

   “Абага чәчәге” олимпиадасында катнашып, Чаллы шәһәрендә үткәрелгән “Фән җилкәннәре” фестивалендә катнашып, физика һәм техник иҗат номинациясендә беренче урынны яулап, ТР Мәгариф министрлыгының беренче дәрәҗәле Дипломына лаек булган 9 сыйныфтагы укучыбыз Айнур Ибраһимов Россия президенты грантына тәкъдим ителде. Уңышлар юлдаш булсын!
Яңалыкларны Рәфхәт Зарипов туплап язды
   3 май, 2008 ел.